Nagdangat sa P300,000 ang kahalitan sang sunog nga nagluntad sa Quezon Street, Barangay Poblacion 2, Sagay City, Negros Occidental, kahapon sang aga.
Sa interview sang Bombo Radyo Bacolod kay Fire Officer 1 Jason D. Eran, Fire Investigator sang Sagay City Fire Station, ang nasunog ang isa ka residential kag ginapanag-iyahan ni Ronald Lobaton Jr. nga may tatlo ka hulot kag ini ang ginabug-usan sang storage, gina-istaran kag ang isa ang ginhimo nga opisina.
Suno kay Eran, nagsugod ang kalayo sa residential property kag naglapta sa iban pa nga bahin sang establisyemento.
Dugang pa sini, wala sang nasamaran sa nagluntad nga sunog.
Ginaimbestigaran pa sa karon ang gintunaan sang sunog.
Nagapanawagan man ini sa mga pumuluyo nga magtawag gilayon sang bombero kun may sunog antes mag-live streaming sa social media agud nga sila ang makaresponde gilayon.
Suno kay Eran, wala sila nakakita sang nag-live streaming angot sa sunog kag nakahibalo lamang sila sang ginsugiran sang nakakita sang video.
