Aminado ang political analyst nga dako ang papel sang America sa pagpugong sa pagluntad sang mga gyera.
Sa interview sang Bombo Radyo Bacolod kay Atty Jomax Ortiz, kumunista na ang bilog nga Europe kun wala ang America sa tion sang 1st kag 2nd World War, gani sila ang gintawag ‘Global Watchdog.’
Suno diri, kun wala ang America, madugay naman nga napulbos ang Israel.
Ilabi na nga sa karun hypersonic missiles ang ginagamit sang Iran, nga nakadesinyo gid agud mabudlay maintercept sang iron dome sang Israel.
Ginapanawagan naman ni US President Donald Trump kay Iranian Supreme Leader Ayatollah Ali Khamenei nga magpatigayon sang ‘unconditional surrender.’
Suno kay Ortiz, luyag ni Trump nga ma-islan ang lider sang Iran sang may moderate nga pagpamuno kag indi nga tuman nga ka Religious Dictatorial ang pagpamuno.
Pahayag ni Ortiz nga mas produktibo kuntani kun may-ara sang peaceful coexistence sa middle east, muslim man, jewish ukon christians.
Ang pag-intra sang America sa middle east ang ginkonekta man ni Ortiz sa pagtukod sang mga Enhanced Defense Cooperation Agreement (EDCA) sites.
Bangod sa EDCA sites, ang China ang indi basta-basta makatukod sang ila military base sa West Philippine Sea.
Ini man ang sitwasyon sa Taiwan, nga indi masakop gilayon sang China bangod sa kahangawa nga mag-intra ang America.
Ginapakamaayo naman ni Ortiz nga indi parehas sang pinsar si Chinese President Xi Jinping kay Russian President Vladimir Putin nga pitik sintas naga-atake.
Pahanumdom ni Ortiz nga kun wala ang America, wala gid sang mahimo ang Pilipinas kun mag-atake ang China.
Ginlantaw man sini nga nagapasilabot ang America sa political lanscape sang Pilipinas bangod sila ang may bad experience na sa mga Duterte nga mas nagdampig sa China.
