Hugot nga nagapanindugan ang Civil Military Officer sang 79th Infantry Battalion sang Philippine Army nga indi informant sang militar ang duha nga gintiro-patay sa Sitio Stop Aguinaldo, Barangay San Isidro, Toboso, Negros Occidental kahapon sang aga.
Madumduman nga duha ang napatay sa shooting incident sa nasambit nga lugar.
Gin-ako man sang makawala nga grupo nga sila ang may kahimuan sang krimen sa panindugan nga ang duha ang asset sang tropa sang gobyerno.
Sa interview sang Bombo Radyo Bacolod kay 1st Lt. Dan Samoza, wala sila sang nahibaluan nga napatay nga asset sang militar.
Suno kay Samoza wala na nagamaintain ang Philippine Army bangud moderno na ang panahon kag may teknolohiya na nga magamit kun may kinahanglanon nga magkuha sang militar sang impormasyon.
Ang mga pumuluyo na mismo ang nagahatag sa ila sang impormasyon paagi sa hotlines kag social media page kaangay sang facebook.
Suno kay Samoza, indi man matuod nga ang mga biktima sa shooting incident sa Barangay Minapasok sa banwa sang Calatrava ang hitman sang tropa sang gobyerno bangud ang mga suldado ang trained para sa patag-awayan.
Suno kay Samoza, ang mga pasibangod sang rebelde nga grupo ang justification lamang sang ila ginahimo nga terrorism kag barbarism.
