Ginapangitaan na sang solusyon sang Bacolod City Government ang mga reklamo sang apektado sa pagbaha sa Barangay Mandalagan kag Barangay Estefania, Bacolod City.
Sa interview sang Bombo Radyo Bacolod kay Bacolod City Mayor-elect Greg Gasataya, amat amat ini nga nagabisita sa mga lugar nga ginbaha ilabi na nga magsige ang pag-ulan nga nakaapekto sa mga pumuluyo.
Suno kay Gasataya, ang Department of Public Works and Highways ang nagpadala sang video sa iya nga nag-overflow ang tubig sa Buri Road, Barangay Mandalagan.
Suno diri may ginadevelop sa lugar kun sa diin ang mga developers ang naghimo sang diversion agud may gwaan ang tubig bangud wala man sang suba sa lugar.
Bangud sa pagbubo sang ulan nag-awas ang tubig sa karsada nga nagtuga sang pagbaha.
Mapatigayon sang coordination meeting ang ciudad agud nga mahimuan sang tikang ang nagluntad nga pagbaha.
Santo sa report nga ginpasa sa iya ang duha ka sapa nga ginalakipan sang Katmon kag ang sa bahin sang rolling hills ang indi na makasarang sang volume sang tubig ilabi na kun mag-ulan bangud sa mga development sa Barangay Mandalagan.
Ginalantaw man nga isa ka rason ang silted nga creek bangud 2017 pa ini ang ulihi nga gin-dredge.
Ginahulat sa karun ang recommendation sang DPWH.
