Wala na sang dapat nga kahangaw-an bangud nag-ayo na ang una nga pasyente sang Mpox sa probinsiya sang Negros Occidental.
Suno kay Provincial Health Officer Dr. Girlie Pinongan nga ang pasyente ang isa ka babayi, 20-anyos, residente sang Talisay City kag may history of travel sa isa ka lugar sa Pilipinas.
Suno kay Pinongan, may yara sang kaso sang Mpox sa ginkadtuan nga lugar sang pasyente apang indi pa makumpirmar kun sini nakuha ang balatian.
Ang pasyente ang nagpakonsulta sadtong ikaduha nga semana sang Hunyo kag ginpaidalom sa test para sa Mpox bangud sang rashes sa iya nga panit kag gilayon ini nagpa-isolate.
Sang nagligad nga weekend, nagwa ang resulta sang test kun sa diin nag-positibo ini.
Suno kay Pinongan, wala gin-admit sa ospital ang pasyente apang ginhatagan na ini sang pagbulong kag padayon nga gina-isolate sa separado nga kwarto sa ila nga balay.
Gilayon naman nagpatigayon sang contact tracing ang Talisay City Health Office sa mga kaupod sa puluy-an sang pasyente apang wala man sang sintomas ang mga ini.
Nagapanawagan ang Provincial Health Officer sa publiko nga indi magkabalaka bangud nabulong kag na-isolate na ang pasyente.
Ginapanugyan man ni Dr. Pinongan ang pagpabilin sang good hygiene ilabi na ang masami nga pagpanghinaw sang kamot agud makalikaw sa mga masakit.
