Padayon pa nga ginabulong ang isa ka lalaki nga nabun-an sa atubang sang Bacolod Ceres South Terminal sa Barangay 31, Bacolod City sang Hunyo 22.
Ang biktima ang hungod nga wala ginhingadlan, kag gina-alegar nga isa ka bugaw.
Sa interview sang Bombo Radyo Bacolod kay Police Captain Rosalino Pugoy, station commander sang Bacolod Police Station 6, nagapaayo sa ospital ang biktima matapos nga gin-operahan.
Suno kay Pugoy, sa panaysayon sang witness ginasukot sang biktima ang suspek apang nagpangutos ang suspek kag nagkuha sang gunting nga ginbuno sini sa biktima.
Ang insidente ang natabo sang alas 5:30 ang takna sang hapon sang Hunyo 22.
Ang biktima ang nagapabilin sa ospital samtang ang suspek ang ginpagwa naman sa detention facility sang Bacolod Police Station 6 bangud natapos na ang reglementary period.
Wala naman napasaka ang kaso bangud kulang ang dokyumento kag ang kalive-in sini ang wala nagapakita kag daw indi na interesado magpasaka sang kaso.
Ginkumpirmar naman sang manager sang lodging house sa atubang sang Ceres South Terminal nga may isa ka customer nga nagcheck-in kag nagkuha sang isa ka babayi.
Suno sa Manager pagkuha sang babayi, ang biktima nga may upod nga kakilala ang nakacheck-in man.
Kasunod sini ang customer ang nagsend sang kwarta sa e-wallet bilang bayad sa babayi.
Ang manager ang nagkadto sa pihak nga branch gani gintugunan nalang sini ang in-charge nga kuhaan na lamang sang charge kun i-cash out ang kwarta kag ihatag sa babayi.
Bangud nga wala nagpamangkot sa front desk kun may yara sang gin-send nga kwarta sa e-wallet para ibayad sa babayi, nag-abot ang bugaw kag ang migo sini kun sa diin ila gilayon ginpapanaog sa room attendant ang customer kag ginsinggitan.
Naglain naman ang modo ang customer gani nagkuha sang gunting kag ginbuno ang biktima.
