Goal achieved, ini ang natabo sa isa ka Negrense nga nangin Top Notcher sa June 2025 Special Professional Licensure Examination for Professional Teachers-Secondary.
Sa interview sang Bombo Radyo Bacolod kay Reyno Abasolo, antes pa ini nagkuha sang Licensure Examination goal sini nga magrank 1 sa mga top notchers.
Suno kay Abasolo, Indi siya education graduate kundi graduate sang commerce degree.
Sang nakagraduate ini sa unibersidad siya ang nagpadulong sa Manila agud nga mag-ubra sa corporate sa sulod sang walo ka tuig.
Nagtrabaho man ini sa corporate sa pungsod Malaysia apang wala na ini nalipay sa iya trabaho gani nagpauli ini sa Pilipinas kag nagkuha sang teaching units sa Binalbagan Catholic College.
Sang nakumpleto na sini ang teaching units nakakita siya sang opportunidad kag nakatudlo sa mga International schools sa Laos kag sa Central Asia kaangay sang Uzbekistan kag Kyrgystan.
Isa ka tuig sini ginpreparahan ang pagkuha sang Special Professional Licensure Examination for Professional Teachers-Secondary.
Dako ang pagpasalamat sini sa Ginoo nga nalab-ot niya ang goal nga magrank-1.
Gintag siya una sang iya abyan nga nakapasar ini apang siya ang naghulat man sa results kag ginkalipay man nga siya ang nagpanguna sa top notchers.
Si Abasolo ang ginbun-ag kag nagdako sa Moises Padilla, Negros Occidental.
Sa karun siya ang nagatudlo sa International School sa Uzbekistan sa Mathematics.
Malipayon ini sa karun sa iya nga career.
Panugyan sini sa luyag magshift career nga indi pa ulihi ang tanan agud nga matuman ang mga handom nga trabaho.
