Maayo ang kahimtangan sang anum ka mga tripulante nga nasalbar gikan sa naglugdang nga cargo barge sang mga mangingisda sa Cadiz City, Negros Occidental.
Sa interview sang Bombo Radyo Bacolod kay Barangay Kagawad Gha Gha Mahinay sang Barangay Sumpit, Cadiz City, nagatrabaho sa Vamda Fisheng Corp., nagtawag ang mga upod sini nga may yara sang mapa-rescue sang Domingo sang gab-i.
Suno kay Mahinay, naglabay sa lugar nga ginapanagatan sang iya mga upod sa bahin sang Masbate ang barge kag pag-abot sa unhan ini ang nagliko.
Suno diri kun wala nakalabay sa lugar ang barge nadisgrasya ang mga sakay sini bangud yara sa 18 feet ang kadalumon sang ginlugdangan sang barko.
Natigayon nga maluwas ang mga tripulante kag gindala sa Port Complex sa ciudad sang Cadiz.
Ang mga tripulante nga nakasalbar ang ginlakipan nanday Angelito Lee, 46 anyos, residente sang Pasig City; Jhunegie Castro Topia, 40 anyos, kag residente sang Guihulngan, Negros Oriental, Argiel Fidalbro Baña, 35 anyos, Rodrigo Ramirez, 67 anyos, mga residente sang Lubang Island; Rodrigo Avergonzado, 50 anyos, residente sang Trinidad, Bohol kag Ereneo Pacheco, 59 anyos, residente sang Caloocan City kag Kapitan sang Barko.
Ginpahayag naman sang isa sa mga tripulante nga gintinguhaan pa nila nga kay-uhon ang barge bangud may buslot ini kag nagasulod ang tubig apang wala na ini masarangan pa gani ini ang naglugdang.
Sa interview sang Bombo Radyo Bacolod kay Angelito Lee, gulpyada lang nga may naglupok sa likod sang barge kag nakita nga nabuslot na kag naglapaw ang tubig kun sa diin nagsulod na tubtob sa tunga-tunga sang barko kag kalakip man sa ginsulod ang engine room.
Suno kay Lee, bangud nga nakita sang kapitan nga nagalugdang na ang barge nagdesisyon ini nga abandunahon na lamang ang barko kag nagtawag sang bulig agud nga sila ang marescue.
Madasig man ang pag-rescue sa ila kun sa diin sila ang nasalbar kag nadala sa port complex sang Cadiz City.
Ginpahayag naman sang broker sang naglugdang nga barge nga ang LCT San Juan Bautista ang nagabiyahe Guihulngan-Cebu apang apat na katuig nga wala nakalayag bangud sang pandemic.
Ang barge ang nagpabilin lamang sa shipyard kag sang Domingo ginlayag ini agud madala sa Navotas matapos nga ini ang ginbakal.
