Nagapati ang political analyst nga Plan B sang administrasyon ang tuyo ni Justice Secretary Jesus Crispin “Boying” Remulla nga magbulos bilang Ombudsman.
Ini bangod si Ombudsman Samuel Martires nga Duterte appointee ang magaretiro na sa bulan sang Agosto.
Sa interview sang Bombo Radyo Bacolod kay Atty Jomax Ortiz, una na nga nagpahayag si Martires nga indi sini tandugon ang ginfile sang House of Representatives nga plunder case.
Ini bangod may-ara pa sang impeachment case nga talakayon sang Senate impeachment court.
Apang antes magdayun sa impeachment trial, botohan pa sang mga Senador sa Hulyo 29 ang mga motion to dismiss, nga ginalakipan sang ginfile ni Senator Bato Dela Rosa kasubong man ang sabat ni Vice President Sara Duterte sa summon sang Senado.
Gani may-ara sang posibilidad nga madimiss ang impeachment case.
Suno kay Ortiz agud nga makaseguro, nagaserbe nga Plan B ang pagbulos ni Remulla kay Martires bilang Ombudsman agud nga hinali nga indi madayun ang impeachment trial sarang sini nga mapasaka sa Sandiganbayan ang plunder case.
Paathag ni Ortiz nga wala sa konstitusyon nga may immunity from suit ang Presidente, apang desisyon sang Korte Suprema nga hatagan ang mga ini sang immunity agud indi maapektuhan ang pagpamuno sa pungsod.
Sa pihak nga bahin, legal question pa kun ini ang aplikable sa Bise Presidente ilabi na nga wala man ini sang function magluwas sa paghulat kun mabakante ang pwesto sang Presidente
Paathag sang abogado nga non-bailable ang plunder case, nga ginapasaka sa mga opisyal nga nagkamol sang masobra P50 million gikan sa kaban sang gobyerno.
Ginalantaw sini nga preparasyon ang tikang para sa 2028 Presidential Elections, bangod malawig ang trial para sa plunder kag magalab-ot pa sa eleksyon.
Bisan indi pa mapamatbatan nga guilty si VP Sara, ginalantaw ni Ortiz nga ini ang political strategy agud mangin mahigko sa panulok sang mga botante si VP Sara.
