Nasapwan nga naga-utaw utaw ang bangkay sang gina-alegar hubog sa baybayon sang Barangay Punta Cruz, Poblacion, Toboso, Negros Occidental ala-1:50 kahapon sang hapon.
Ang biktima ang ginkilala nga si Emanito Carmelotes, 48 anyos, balo, mangunguma kag residente sa Sitio Cotcot, Barangay General Luna, Toboso.
Sa interview sang Bombo Radyo Bacolod kay Police Lt. Antonneitte Loreaz, deputy chief of Police sang Toboso Municipal Police Station, ginpahayag sang pamilya nga ang biktima ang naghalin sa ila balay sang kapin alas-1:00 tubtob alas-2:00 sang udto agud magpaninda sa wet market.
Apang sa masami, si Emanito ang naga-inom sang makahulubog nga ilimnon antes manindahan.
Ginalantaw ni Loreaz ang posibilidad nga hubog na ang biktima sang magpaninda kag bangod baybayon na ang likod sang merkado, mahimo nga nagpangihi ang biktima kag nahulog.
Ginpaidalom man gilayon sa postmortem examination ang bangkay kag wala man sang nakita nga signs of struggle sa biktima, samtang natumod nga pagkalunod ang rasun sang kamatayon sini.
