Nakuhaan sang suspected nga illegal nga druga ang isa ka 11 anyos nga bata nga lalaki sa Abada Escay, Barangay Vista Alegre, Bacolod City kaina sang hapon, Hulyo 8.
Sa interview sang Bombo Radyo Bacolod kay Barangay Kagawad Elizde Bernardino, ginpalapitan nila ang bata kun sa diin ginhaboy sini ang sachets sang suspected shabu apang ginpamulot niya ini.
Suno kay Bernardino, ginpamangkot nila ang menor de edad kun sa diin ini niya ginkuha apang ang sabat sa ila nga sa basurahan.
Interview sang Bombo Radyo Bacolod kay Barangay Kagawad Elizde Bernardino sang Barangay Vista Alegre, Bacolod City
Apang wala man nakumpirmar kun sa basurahan gid man ini nga nakuha sang bata.
Suno diri, ang lugar kun sa diin narecover ang sachets sang suspected sa shabu sa menor de edad ang noted naman nga madata ang pagbaligyaanay sang illegal nga druga.
11 ka sachets sang suspected shabu ang narecover kun sa diin nagabug-at sang kapin sa 5 grams.
Wala naman ginpamangkot dugang ang bata bangud mahimo nga matrauma ini.
Ginpatigayon ang turn-over sang sachets sang suspected shabu sa mga kapulisan sang Bacolod Police Station 7 sa Barangay Hall sang Barangay Vista Alegre, Bacolod City subong nga hapon.
Nagapanugyan ang Barangay Kagawad sa mga pumuluyo sang Barangay Vista Alegre nga mangin mabinantayon bangud ang illegal nga druga ang makaguba sa kabuhi sang mga kabataan.
