Ginarekomendar sang retired Ship Captain kag karun consultant sa isa ka manning agency nga dapat maghimo sang helpdesk ukon group chat ang Department of Migrant Workers agud nga may madangpan ang mga seafarer nga naga-refuse to sail sa mga high risk areas.
Madumduman nga apat ang napatay nga ginalakipan sang tatlo ka Pilipino kag isa ka Russian matapos gin-atake kag ginpalugdang sang Houthi rebels ang Liberia-flagged Bulk Carrier nga Eternity C sa Red Sea.
Sakay sa barko ang 22 ka crew members nga ginalakipan sang 21 ka Pilipino, isa ka Russian kag may tatlo naman nga security personnel.
Napulo naman ang nahimo nga marescue samtang ang iban ang hostage sa karun sang Houthis sa Yemen.
Sa interview sang Bombo Radyo Bacolod kay retired Ship Captain Edgardo Flores, sa ginhimo sang DMW nga pagsuspen sang lisensya sang manning agency, indi lamang ang mga manugsakay nga mga seafarers ang maapektuhan, bangod indi man makapauli ang mga dapat magapanaog na sa barko tubtob indi malift ang banning.
Pahanumdom sini nga ang trabaho sang manning agency amo ang pagdeploy lamang sang tawo, kag sila ang wala sang ihibalo kun diin nga routa magalabay ang mga barko nga sakyan sang seafarer.
May ligwa man ang mga seafarer nga may “refuse to sail” sa mga high risk areas kaangay sang Red Sea kag Gulf of Aden.
Apang sa masami, kulang sa monitoring ang DMW kag iban pa nga ahensya, kag nagakahibaluan na lamang kun diin ang barko kun may ara na sang kaangay nga insidente.
Suno diri, nagaduhaduha naman nga magrefuse to sail ang mga seafarers bangod wala man nagalab-ot sa DMW ang ila request, gani ang kahangawa sang mga ini nga sila ang indi na pasakyon kag madulaan sang trabaho.
Gani panawagan ni Flores nga dapat may helpdesk ukon group chat agud derekta nga makasugid ang mga seafarers kun diin ang ila nga routa kag kun may request nga ‘refuse to sail’ ini ang mafacilitate sang DMW.
Pahayag pa sini nga ang rasun nga nagarisgo ang mga principals sa pagbyahe sa high risk areas agud nga makatipid, bangod magadako ang transport cost kun magalibot pa ang barko nga mahimo man nga makapamahal sa presyo sang produkto.
Bisan pa nga may ginapaupod nga armado nga gwardiya, ang mga ini ang nakadesinyo lamang sa pag-away sa mga pirata nga nagapanaka sang barko.
Apang ang armed guards ang wala na sang pulos sa atubang sang mga long range missiles.
