Nagdangat sa masobra nga P3.8 million ang ginbilin nga kahalitan sa nagluntad nga sunog sa Sagay Star Cable, Star Viewing Network Inc. nga nahamtang sa Quezon Street, Barangay Poblacion 1, Sagay City, Negros Occidental.
Ang building nga gintupok sang kalayo ang ginapanag-iyahan ni alyas Sherjames, 58 anyos, negosyante kag residente sang Capitol Ville, Barangay Villamonte, Bacolod City, Negros Occidental.
Sa interview sang Bombo Radyo Bacolod kay Fire Officer 2 Dave Delfinio, Fire Chief Investigator sang Sagay City Fire Station, may yara sila sang nabaton nga tawag alas-2:45 ang takna sa hapon sang Sabado nga may nagluntad nga sunog kag gilayon man nila ini nga ginrespondehan kun sa diin pag-abot sa fire scene dako na ang kalayo kag ini ang nag-umpisa sa ikaduha nga panalgan sang commercial building.
Suno diri, gintinguhaan sang mga bombero nga indi na maglaton sa iban nga building ang kalayo bangud ini ang nahamtang sa tunga sang balaligyaan kag residential buildings.
Ginpasaka man sa second alarm ang sunog kag gilayon man nga nagpangayo sang bulig sa Cadiz City kag Escalante City Fire Station para sa augmentation samtang nagresponde man ang Lopez Jaena Fire Sub Station kag ang fire truck sang Disaster Risk Reduction Management Office sang Cadiz City.
Suno kay Delfinio nagdeklarar sila sang fire out alas 5:24 ang takna sa hapon bangud ang ikaduha nga panalgan ang himo sa kahoy kag indi nila ini masulod sa kahangawa nga marusdak kag sa terrace lamang sila nagtungtong agud mapatay ang kalayo.
Ginaimbestigaran pa sa karun ang ginhalinan sang kalayo kag ang damage ang ginabanta nga nagdangat sa P3,870,000.
Ginahulat pa nila sa karun nga makapasa sang affidavit of fire loss ang tag-iya.
Wala man sang nasamaran ukon casualty sa nagluntad nga sunog.
