Pagatutukan sang alkalde sang ciudad sang Bacolod ang dredging kag pagtinlo sang water ways samtang ginadihon ang mga flood control projects para sa Bacolod City.
Sa interview sang Bombo Radyo Bacolod kay Bacolod City Mayor Greg Gasataya, ginaamat amat na nila libot ang mga outfall sang mga tubig sa ciudad.
Ginbalikan man sang alcalde ang natabo nga pagbaha sang Biyernes kun sa diin una nga ginhimo ang rescue kag ang paghatag sang relief goods sa mga nabahaan.
Samtang nagapatigayon ang mga ini sang relief operations ginkadtuan sang mga ini ang mga lugar nga madugay ang pagsubside sang tubig kag Nakita sa assessments nga ang outfall, drainages kag inlets ang napuno sang basura.
Naghatag man ang ciudad sang pumps agud nga mapagwa ang tubig sa mga manubo nga lugar.
Kahapon nagpatigayon sang meeting sa Bacolod City Government Center nga ginpangunahan ni Bacolod City Mayor Greg Gasataya, kag Vice Mayor Kalaw Puentevella kaupod ang mga katapo sang Disaster Risk Reduction Council agud diskusyunan ang mga dapat himuon para sa sarang mahimo agud masolusyunan ang pagbaha samtang wala pa sang long term solution.
Gin-athag man ni Mayor Gasataya nga ang diversion channel sa likod sang Barangay 10 kag Barangay 12 ang indi operational bangud may yara pa sang engineering technology agud nga mangin operational.
Nagdangat naman sa 26 tonnes sang basura ang makuha sa suba sa isa ka adlaw kasunod sang ginapatigayon nga dredging activity.
