Apat ka mga balay ang naanod sa suba matapos matiphag ang duta sa Barangay Robles, sa banwa sang La Castellana.
Sa interview sang Bombo Radyo Bacolod kay La Castellana Municipal Disaster Risk Reduction and Management Office head John de Asis, gina-assess pa nila ang sitwasyon apang sa inisyal sa apat ka balay, 17 ka indibidwal ang apektado.
Ginapahayag nga ang duha ka pamilya ang yara sa evacuation center, samtang wala naman sang tawo ang duha bangod nakahalin na nakaligad pa lang nga inadlaw.
Suno kay De Asis, nagsaka ang tubig sa suba alas-2:00 sang kaagahon.
Aminado ini nga gina-ab ab na sang tubig ang kilid sang suba, kag naghumok bangod sa mabaskog nga ulan rasun nga ini ang natiphag kag bangod mahumok na ang pundasyon nadala ang mga pamalay kag naanod.
Suno kay De Asis, may mga warnings naman sa mga nagapatukod sang balay sa kilid sang suba, kag sa karun nagahulat na lamang ang La Castellana Municipal Government sa approval sang request sa pagtukod sang flood control project.
Ginapakamaayo na lamang sini nga wala sang napilasan sa insidente.
