Nag-abiso ang alkalde sa ciudad sang Bacolod nga magpatigayon sang pre-emptive evacuation sa mga pumuluyo ilabi na ang nagapuyo sa kilid sang suba, baybay kag mga lugar nga masami ginabaha kasunod sang pag-inulan.
Sa interview sang Bombo Radyo Bacolod kay Bacolod City Mayor Greg Gasataya, nakabaton ini sang impormasyon nagikan sa Department of the Interior and Local Government (DILG) nga magpatigayon sang preemptive evacuation bangud sa sitwasyon sa ciudad sang Bacolod kag sa ulihi nga rainfall warning sang PAG-ASA yara sa red ang Negros Occidental kalakip na ang ciudad sang Bacolod.
Suno kay Gasataya, ang mga ginpanugyanan nga mag-evacuate ang mga residente ilabi na ang mga may yara na sang naeksperyensya nga pagbaha ilabi na ang sang mga nagliligad.
Kagab-i nag-monitor man ang alkalde kag wala man sang namonitor ang Bacolod City Disaster Risk Reduction Management Office (CDRRMO) nga may yara sang nagluntad nga pagbaha sa pila ka Barangay sa Bacolod City.
Ginpahayag man sang alkalde nga sang udto ang pila ka mga ginrespondehan sang ciudad amo ang mga nagkalatumba nga mga puno malapit sa Bacolod City Government kag Negros Occidental Provincial Capitol.
Suno pa sa alkalde nga nakaluy-an man nga wala man sang narecord nga pagbaha indi kaangay sang nagligad nga pag-inulan.
Samtang ang kalabanan man nga reklamo nga nabaton sang mga ini amo ang mga nagabara nga drainage system sang mga Purok sa mga Barangay sa Bacolod City.
Nangin aktibo naman ang mga Barangay Officials sa mga Barangay sa ciudad sang Bacolod kag ang mga ini na mismo ang nagalibot agud nga lantawon ang sitwasyon sang mga residente.
Ang Barangay Officials ang dapat nga mag-una sa pagresponde kag maga-augment ang ciudad kun indi na masarangan.
Ginpasalamatan sang alkalde ang tanan nga mga volunteers nga nakastandby ingkaso nga may kinahanglan nga respondehan.
