Nakita na apang wala na sang kabuhi ang anay seaman nga naanod sa suba sa ciudad sang Himamaylan, Negros Occidental.
Ang biktima ang ginkilala kay Meljohn Cordero, 45 anyos kag residente sang Sitio Benedicto, Brgy. Cabadiangan, Himamaylan City kag ini ang nakita sa Purok GMA, Barangay Payao, banwa sang Binalbagan.
Sa interview sang Bombo Radyo Bacolod kay Police Captain Joelan Vinson, Officer-in-Charge sang Binalbagan Municipal Police Station, kahapon mga alas 2:00 ang takna sang hapon natigayon nga ma-retrieve ang bangkay ni Cordero sa nasambit nga lugar.
Suno kay Vinson, ang lawas sang biktima ang nakita sang residente sang nasambit nga lugar matapos nga masampay.
Positibo man nga ginkilala sang pamilya ang bangkay sang biktima kag ini ang yara na sa advance state of decomposition.
Suno sa hepe, wala sang foul play ang natabo kag ini ang aksidente nga naanod bangud sa mabaskog nga daludo sang tubig.
Panugyan sini nga lantawon gid ang sitwasyon sang mga sapa kag overflows antes magtabok agud nga malikawan ang kaangay nga aksidente.
