Indi magnubo sa apat ka mga persona ang nareport nga nagkalamatay bangud sa Tropical Cyclone Crising suno sa National Disaster Risk Reduction and Management Council (NDRRMC) kag ginpakusog pa nga southwest monsoon.
Sa situational report sang ahensya as of July 20, ginkumpirmar sang ahensya ang isa ka fatality nagikan sa CARAGA region, samtang ang tatlo ka iban pa, duha nagikan sa Northern Mindanao (Region 10) kag isa nagikan sa Davao Region (Region 11) ang ginaverify pa.
Ginaverify pa sa karun sang NDRRMC ang mga reports sang tatlo ka mga persona nga napilasan samtang apat ka indibidwal ang nareport naman nga missing.
Sa latest figures, ang numero sang pamilya nga naapektuhan sang weather disturbance ang nagdangat na sa 132,835 ukon kapin 420,355 individuals sa palibot sang pungsod.
Suno sa NDRRMC, kabug-usan nga P165 million ang narekord nga halit sa imprastraktura.
