Padulong na sa Washington D.C. si President Ferdinand “Bongbong” Marcos Jr. para sa isa ka official visit nga ginalakipan sang isa ka meeting kaupod si US President Donald Trump.
Sa iya departure speech sa Villamor Air Base sa Pasay City, ginpahayag ni Marcos nga ang iya pagbisita ang may tinutuyo nga iduso ang para sa “greater economic engagement.”
Nalakip sa mga topiko nga pagaistoryahan ni Marcos kag Trump amu ang 20 percent nga tariff rate sa mga produkto sang Pilipinas nga masulod sa Amerika kag nagalaom ang Manila nga makaangkon sang isa ka mutually acceptable kag beneficial tariff deal sa U.S.
Ang pagbisita ni Marcos ang humalin Hulyo 20 tubtob 22.
Siya ang labing una nga ASEAN head of state sang Amerika sa idalum sang administrasyon ni Trump.
Nagbiya ang aircraft sini sa Manila alas 10:20 sang aga kahapon.
Makigkita si Marcos sa semiconductor industry players sa Amerika subong nga semana samtang ginapadayon sang Manila ang ila negosasyon agud mabuhinan ang 20 percent tariff nga ginpatuman sang Washington.
Ini suno kay Philippine Ambassador to the United States Jose Manuel Romualdez.
Ang semiconductors, nga exempted nagikan sa mga taripa, ang nangin top import sang Pilipinas sa Amerika.
Suno kay Romualdez, magaistorya si Marcos sa mga semiconductors industry, nga tuman ka importante sa atun.
Wala naman ginhingadlan ni Romualdez ang specific nga mga kumpaniya nga iga-meet ni Marcos sa iya tatlo ka adlaw nga official visit sa Amerika, apang una na nga ginpahayag sang Presidente nga ang iya ikalima nga trip sa may pinakadako nga ekonomiya sa kalibutan ang nagatukod sang active exchanges kag maga-enhance sang ila national interests kag magapasanyog sang ila alyansa.
