Indi magnubo sa lima ka persona ang napatay matapos masunog ang isa ka barko sa Indonesia, nga may sakay nga masobra 200 ka mga pasahero, kun sa diin kalabanan ang naglumpat sa dagat agud makaluwas sa kalayo.
Ang KM Barcelona 5 ferry ang nagkalayo samtang nagalayag sa kadagatan sang Sulawesi island, Indonesia.
Ang insidente ang natabo isa lamang ka semana matapos maglugdang ang isa man ka barko sa Bali, Indonesia nga nagpatay sang 19 ka persona.
Duha sa lima nga napatay ang tubtob sa karun wala pa makilala, samtang 284 naman ang madinalag-on nga nasalbar.
Ang barko ang nasunog samtang nagalayag padulong kuntani sa Manado, capital sang North Sulawesi province, kun sa diin madamo sang pasahero nga ginpili nalang maglumpat sa dagat suksok ang life jacket.
Nagbulig man ang mga mangingisda sa pag-evacuate sang mga biktima sa kalapit nga mga isla, samtang ang mga nasamaran ang gindala na sa ospital.
