Natukiban sang alkalde sang ciudad sang Bacolod ang isa ka asinan nga ginpatindog sa higad sang baybay sa Barangay Banago nga ginalantaw ang pader sini ang isa ka rason sang pagbaha sa Santa Clara sa Barangay Mandalagan.
Ini ang nadiskubrehan sang alkalde matapos nga personal nga nagalibot ang alkalde sa ciudad agud nga mag-inspection sa mga lugar nga kinahanglan ma-clearing bilang isa sa mga solusyon sang pagbaha.
Sa interview sang Bombo Radyo Bacolod kay Bacolod City Mayor Greg Gasataya, nagmeeting sila upod ang mga residente sang Santa Clara, Capitol Ville kag ang Anti-Baha kun sa diin madamo sang mga interesting nga mga butang ang gindiskusyon kag isa na diri ang drainage sa Domingo Lacson nga natabunan sang pader nga ginpatindog sang isa ka asinan.
Ang drainage ang magarekta kuntani ang tubig gwa sa dagat ingkaso nga magdako ang volume.
Apang indi na ini makarekta bangud sa gintukod nga pader kag sa ginbutang nga daw bintana-bintana nga ginalabayan pa sang tubig antes mag-ilig sa dagat.
Suno sa alkalde ang pader ang isa ka obstruction kag kun wala ini makabulig ini sa paghagan-hagan sa pagluntad sang pagbaha sa ciudad.
Magapagwa ang ciudad sang Notice kag magahimo sang nagakaigo nga tikang ang ciudad agud nga masolusyunan ang ginpadangat nga concerns sang mga residente sang Santa Clara, Capitol Ville kag Domingo Lacson.
