Nagalaom ang Human Rights Lawyer nga indi na ipilit sang Senado nga dayunon ang impeachment trial batok kay Vice President Sara Duterte kag baliwalaon ang ruling sang Korte Suprema nga ini ang unconstitutional.
Sa interview sang Bombo Radyo Bacolod kay Atty Cesar Beloria, masobra 80-pages ang ruling sang Supreme Court apang duha ang nakita nga rasun sa ruling kalakip na ang violation sa one-year bar rule kag violation sa due process.
Nabutang man sa ruling nga may natabo nga grave abuse of descrition matapos wala gin-aktuhan sang House Secretary General ang tatlo ka una nga impeachment complaint.
Suno sa Korte Suprema, bangod ginbatun sang House Secretary General ang tatlo ka impeachment case, bangod wala ginpasaka sa Office of the House Speaker, ini ang makabig na nga dismissed.
Pahayag ni Beloria nga nagakahulugan nga ginakonsiderar ang tatlo ka impeachment case, gani makabig nga void ab initio ukon wala naga-exist ang ika-apat nga impeachment case nga amo ang gintransmit sa Senado, bangod sa one-year bar rule.
Positibo man ang Human Rights Lawyer nga magafile sang Motion for Reconsideration ang House of Representative, apang kwestyonable pa kun ini ang sarang mahimo.
Ini bangod indi kaangay sang iban nga court rulings, nga may-ara pa sang 15-days antes ang effectivity gani sarang pa maka-mosyon, nakapagkit naman sa ruling sang unconstitutionality sang articles of impeachment nga ini ang ‘final and executory.’
Sa rulings, bangod gindeklarar nga void ab initio ang articles of impeachment, wala naman sang jurisdiction ang Senado sa kaso.
Nagalaom si Beloria nga makumbinsir ni Senate President Chiz Escudero ang mga Senador nga indi na kontrahon ang desisyon.
Kun piliton sang Senado nga magconvene bilang impeachment court, nagakahangawa ang abogado nga madulaan sang pulos ang desisyon sang ‘court of last resort’ ukon sang Korte Suprema.
