Padayon nga ginamonitor sa ospital ang sitwasyon sang officer-in-charge sang La Castellana Municipal Police Station matapos nga makaangkon sang samad kasunod sang pagkahulog sang ila nga patrol car sa kalog.
Sa interview sang Bombo Radyo Bacolod kay Police Captain Judesses Catalogo, spokesperson sang Negros Occidental Police Provincial Office nga wala pa nakagwa sa ospital si Police Captain Dennis Melgarejo sa ospital bangud wala pa natapos ang laboratories kag may yara sang fracture sa iya nga ribs.
Apang gin-athag ni Catalogo nga ini ang yara na sa estable nga kondisyon.
Una na nga ginpahayag ni Catalogo nga nagikan sa Bacolod City ang patrol car matapos nga ginpaidalum sa drug test ang suspek kag sang pabalik na sa banwa, aksidente nga nahulog sa kalog ang salakyan.
Suno kay Catalogo madanlog ang dalan bangod sa wala untat nga pag-ulan rason nga nahulog sa kalog ang salakyan.
Gindala sa ospital sa ciudad sang Bacolod si Police Captain Dennis Melgarejo bangod sa injury sini sa ulo kag sa ribs samtang minor injuries naman ang na-agom sang isa ka police kag sang subject suspek.
