Nagdangat sa isa ka oras kag pito ka minuto ang ikaapat nga State of the Nation Address ni President Ferdinand “Bongbong” Marcos Jr.
Alas 3:30 sang hapon sang nag-abot ang Presidente sa Kamara sakay sa presidential chopper.
Alas 3:58 sang hapon sang gintawag kag ginpakilala si Marcos sa session hall sang Kamara, nga senyales sang pagsugod sang iya report.
Pagkatapos sang duha ka minuto, nagcall order to order na ang Kamara kag Senado, nga senyales sang pagsugod sang joint session sang 20th Congress.
Ini ang ginsundan sang pagkanta sang Pambansang Awit nga ginpangunahan ni The Voice Season 26 Grand Champion Sofronio Vasquez.
Kaangay sang una, lima ka church leaders ang liwat nga nagpanguna sa pagpangamuyo antes ang report sang Presidente.
Alas 4:05 sang hapon sang opisyal nga nagsugod ang SONA ni Marcos.
Diri ginreport sang Presidente ang nahimo sang iya administrasyon sa nagkalain-lain nga sektor kaangay sang agrikultura, science and technology, transportasyon, internet connectivity, sports, food security, defense, social services, power sector kag iban pa.
Nakabaton sang 124 ka palakpak kag duha ka standing ovations ang ika-apat nga SONA.
Nagstanding ovation man ang mga audience sang ginsaway ni Marcos ang kurapsiyon sa flood control projects.
Suno sa iya, sa paglibot niya pagkatapos sang southwest monsoon kag mga bagyo Crising, Dante, kag Emong, natukiban ang substandard nga flood-mitigation systems.
Sang nagligad nga tuig, nakabaton siya sang 125 ka palakpak kag duha ka standing ovation sa iya 82 minutos nga speech.
Sang 2023, ginpalakpakan siya sang 68 ka beses.
