Personal nga nagpadulong si Israeli Consul Moti Cohen sa balay nanday Leah Mosquera, ang Negrense caregiver nga napatay sa missile attack sang Iran sa Israel, kahapon.
Sa interview sang Bombo Radyo Bacolod kay Cohen, nagpadulong sila sa probinsya agud nga mag-courtesy call kay Negros Occidental Governor Eugenio Jose “Bong” Lacson kag kay San Enrique Mayor Jilson Tubillara antes nagpadulong sa balay sang napatay nga Negrense caregiver sa Brgy Guintorillan, San Enrique.
Suno kay Cohen, ini na ang ikaduha niya nga pagpadulong sa probinsya bangud siya ang nagbisita man sa pamilya ni Loreta Alacre, ang Overseas Filipino Worker nga residente sang Cadiz City nga napatay man sang nagpang-atake ang Hamas sa border sang Israel sadtong Oktobre 2023.
Suno diri, pagabuligan sang Israel Embassy sa Pilipinas ang pamilya Mosquera agud nga makuha sang mga ini ang mga nagakadapat nga benepisyo.
Kalakip diri ang bereavement benefits, financial assistance kag iban pa.
Dugang pa sini nga kun ano ang benepisyo nga ginahatag sa mga Israeli nga napatay sang gyera, ang ihatag man sa napatay nga foreign nationals kaangay sang Negrense caregiver.
Dako ang pagpasalamat sang Pamilya Mosquera sa pagbisita ni Israeli Consul Moti Cohen nga nagpalab-ot sang pagpakig-unong sa nalisdan nga pamilya.
Sa interview sang Bombo Radyo Bacolod kay Dona Mosquera, utod ni Leah Mosquera, nagpasalig si Cohen nga ang mga benepisyo nga nagakadapat para sa mga utod ni Leah ang ila nga mabatun.
Suno diri, sa tion nga magbalik ang ila nga utod nga si May Joy nga isa man ka caregiver sa Israel, ini naman ang magaproseso sang mga kinahanglanon nga mga rekisitos agud nga makuha ang mga benepisyo para kay Leah.
Suno kay Dona nagahimo na sang tikang ang Philippine government agud nga makabulig sa pamilya ilabi na sa mga ginapaeskwela nga mga hinablos sang napatay nga Negrense caregiver.
Ginpalab-ot man sini kay Cohen ang personal nga pagpasalamat sa Israeli government nga naghatagan sang atensyon sa natabo sa iya nga utod.
Dako ang pagpasalamat sini sa gobyerno sang Israel nga nabalik sa Pilipinas ang bangkay ni Leah.
Nag-estorya man si Cohen sang makadali sa mga tawo nga nagbisita sa haya.
Ginpasalamatan man sini si President Ferdinand “Bongbong” Marcos Jr., Negros Occidental Governor Eugenio Jose “Bong” Lacson kag ang tanan nga mga naghatag sang financial assistance kun sa diin wala na sila sang nangin problema sa pagtransport sang bangkay sang ila nga utod bangud ini ang libre na, kasubong man naapresyar man nila ang tanan nga nagpadala sang bulak para kay Leah.
