Aminado ang political analyst nga may punto ang pagfile sang petition sa Korte Suprema sa pagcite in contempt kanday Presidential Adviser for Poverty Alleviation Larry Gadon, kasubong man kanday Congressman Percival Cendania kag political analyst Richard Heydarian.
Ini kasunod sang ila below the belt nga mga kritisismo sa Justices sang Korte Suprema kasunod sang ruling nga unconstitutional ang articles of impeachment batok kay Vice President Sara Duterte.
Nahibaluan nga si Atty Ferdinand Topacio sang pro-Duterte camp, ang nagfile sang petition batok kay Gadon, samtang sanday Atty Mark Tolentino kag Rolex Suplico naman ang nagfile batok kanday Cendania kag Heydarian.
Sa interview sang Bombo Radyo Bacolod kay Atty Jomax Ortiz, wala sang problema sa pagpagwa sang kalain sang buot, apang indi dapat maglapaw sa demarcation line.
Suno diri, apisar nga may freedom of expression sa bill of rights, ini ang may limitasyon.
Panindugan ni Ortiz nga indi nagakadapat nga magbuya sang derogatory remarks batok sa Final Arbiter of Justice.
Suno kay Ortiz, nadisbar na sadto si Gadon bangod sa pagbuya sini sang derogatory remarks sa mga nagarally nga estudyante sang University of the Philippines.
Ini ang ginhimo ni Gadon sang siya ang pro-Duterte pa, samtang siya ang hinali nga nagtipyok sa kampo ni President Ferdinand “Bongbong” Marcos Jr. kag gilayon nga ginhatagan sang posisyon sa gobyerno.
Suno kay Ortiz, kun sadto nadisbar si Gadon bangod sa ginbuy-an nga tinaga sa mga UP students, mas mabug-at sa karun bangod ang Justices na ang gintawag sini nga tuta sang mga Duterte.
Bangod indi na abogado, indi naman madisbar si Gadon, gani ginalantaw nga ini ang icite sa indirect contempt upod sa abogado kag political analyst.
Suno diri, dapat sundon nila si former Senator Leila de Lima nga apisar nagbuya sang indi maayo nga tinaga, gilayon ini nga nagpangayo sang pasaylo.
Sa nahibaluan ni Ortiz, wala sang time limit sa pagcite, apang nagapati ang abogado nga indi man magpasobra ang Korte Suprema.
Sa masami lima tubtob napulo ka adlaw nga ginadetain ang mga abogado nga ginacite in contempt sa mga Regional Trial Court.
