Ginkondenar sang transport sector sa ciudad sang Bacolod ang natabo nga pagpanakit sa driver sang Handumanan-Libertad nga jeep nga ginpakal sang bato sa Purok Kabugwason, Barangay Mansilingan, Bacolod City.
Madumduman nga nagbayahe ang driver nga si Sebastian Tuazon sang may isa ka pamatan-on nga pasahero nga nangayo sang iya sensilyo.
Apang sang gintsekyar ni Tuazon ang kwarta sa iya bulsa, insakto lamang ini kag wala na sang sobra pa para isinsilyo sa pasahero.
Ginkalain sang pamantan-on nga wala siya ginhatagan sang sensilyo kag ginsegi ka buyayaw ang driver.
Pag-abot sa Purok Kabugwason, Barangay Mansilingan, dali-dali nga nanaog ang pamatan-on kag nagtabok.
May tatlo naman ka mga pamatan-on nga nagpalapit sa driver kag gindumdom niya nga magakabit ukon masakay ang mga ini apang nakibot niya nga ginhabuyan siya sang balas kun sa diin naigo pa si Bombo Mia Mae Francisco nga nagapungko sa passenger seat.
Gintuyo nga bun-on sang suspek ang driver apang natapi sini ang kutsilyo.
Ginpakal man sang suspek sang bato ang driver kun sa diin nakaangkon ini sang pilas sa baba.
Sa interview sang Bombo Radyo kay Rudy Catedral, presidente sang Bacolod Alliance of Commuters, Operators and Drivers (BACOD), hugot niya nga ginakondenar ang ginhimo sang pasahero sa driver.
Suno diri ang driver sang traditional jeep madamo na sang problema halin sa ila rehistro kag prangkisa tubtob sa ila mga responsibilidad sa ila pagpangabuhi.
Pahayag ni Catedral, indi mahimo nga pabay-an lang ini kag dapat gid manabat ang may sala.
