Aprubado na sang World Bank ang $700-million ukon P40.43 billion nga loan para sa Pilipinas agud nga mapasanyog ang climate resilience sang 18 million ka mga pamilya, partikular na sa mga lugar nga pigado kag mataas ang risgo sa climate-related hazards.
Sa isa ka statement, ginpahayag sang Washington-based lender nga gin-aprubahan sang board ang pagpa-utang para sa Philippine Community Resilience Project ukon kilala nga “Pagkilos.”
Suno sa World Bank, ang proyekto ang ginalauman nga makabulig sa paghagan-hagan sang risgo sang ginabanta 18 million ka mga pamalay sa mga kalamidad sa masunod nga mga tuig, lakip na ang indigenous people (IP), mga kababainhan kag mga benepisyaryo sang conditional cash transfer program sang gobyerno.
Ang Pilipinas ang nagapanguna sa World Risk Index bangud sang mataas sini nga risgo kag exposure sa cyclical extreme events.
