Sari-sari ang opinyon sang mga nagapila para sa voters’ registration kun i-postpone ang Barangay and Sangguniang Kabataan Elections. Padayon ang pilahay para sa pagparehristro para sa natalana kuntani nga BSKE sa Disyembre 1, 2025 apang ginahulat pa kun permahan ni President Ferdinand “Bongbong” Marcos Jr. ang hagna nga magapostpone sang BSKE kag isaylo sa una nga Lunes sang Nobyembre 2026.
Suno sa 16 anyos nga si Jairus Franz Balayo, timprano pa siya nagpila para sa voter registration kag suno diri luyag niya nga indi pag-ipostpone ang eleksyon bangod ginhatagan sini sang tiyempo ang pagparehistro.
Suno pa diri, mas maayo nga madayon ang eleksyon agud maislan naman ang mga nagapungko nga opisyal nga buslan sang mga nagaserbisyo sang husto.
Kasubong man nga luyag sang miyembro sang Lesbian, Gay, Bisexual, Transgender, Queer, Intersex, Asexual (LGBTQIA) nga indi mapostpone ang BSKE bangod may yara ini sang ginasuportahan nga opisyal nga nagaserbisyo sang maayo para sa Brgy…Samtang, luyag naman sang senior citizen nga mapostpone ang eleksyon para sa mga Brgy officials nga nagaserbisyo sang maayo.
Suno kay Letecia Chavez, 71 anyos, ikatatlo na nga balik sang iya 18 anyos nga apo para magparehistro.
Suno diri, sa una nila nga pagpila wala ginbaton ang ID sang iya apo bangod wala sang address.
Sa ikaduha nga adlaw wala man sa gihapon ginbaton ang ila gindala nga dokyumento kag sa karun amo na ang ikatatlo nga adlaw nga nagpila sila para sa voter registration.
Para kay Chavez, wala sang problema nga mapostpone ang eleksyon bangod may mga opisyales nga nagatrabaho kag nagaserbisyo sang insakto.
