Case close na ang shooting incident nga nakapatay sang negosyante kag board of directors sang pribado nga eskwelahan nga naglunatd sa Barangay Dancalan, Ilog, Negros Occidental kahapon sang aga, matapos nga mapatay man ang suspect.
Madumduman nga ang biktima ang napatay matapos nga gintiro sa Barangay Dancalan, Ilog, Negros Occidental pasado kahapon sang aga.
Sa pagpangusisa sang mga otoridad nga isa ka negosyante kag school administrator sang Dancalan Private Academy ang biktima nga ginkilala kay Philip George Vail alyas Pat.
Ang suspek ang ginkilala kay Vannie Galagate alyas Dodoy, 34 anyos, kag residente Sitio Gusnit, Barangay Pinggot, Ilog, Negros Occidental.
Sa interview sang Bombo Radyo Bacolod kay Police Major Randy Babor, Chief of Police sang Ilog Municipal Police Station, makabig nga case close na ang shooting incident apang magapadayon sila sang imbestigasyon bangud may posibilidad nga may iban pa nga tawo nga imbulbado sa pagpatay sa biktima.
Suno kay Babor ang suspek nga si Galagate ang imbulbado man sa isa ka shooting incident nga nagluntad naman sa Barangay Pinggot.
Suno sa hepe, daan nga hiligut-anon kag may kaangtanan sa propedad ang ginalantaw nga rason sa pagpatay sa biktima.
Una na nga ginpahayag ni Police Major Randy Babor, hepe sang Ilog Municipal Police Station, gindul-ong sang biktima ang iya asawa sa buluthuan apang makaligad ang pila ka minutos nagpalapit ang suspek kag gintutokan sang armas-luthang ang biktima, kag maayo lamang nga wala naglupok ang armas.
Gilayon nga ginkuha sang negosyante ang iya man nga armas kag nagbalos sa suspek.
Nagbaylohanay ang duha sang lupok tubtob nga naigoan kag napatay si Alyas Pat.
Samtang, may police personnel naman nga malapit sa lugar nga nakabati sang mga lupok nga gilayon man nga nagresponder.
Pag-abot sang kapulisan, nagahamyangon na si Alyas Pat samtang magapalagyo na kuntani ang suspek.
Gin-manduan sang kapulisan ang suspek nga magsurrender apang nagbato ini kag ginpalukpan ang otoridad.
Gilayon man nga nagbalos ang kapulisan kun sa diin naigo sa li-og si Galagate nga gintunaan sang iya kamatayon.
Samtang, nasalabat naman sang bala ang isa ka tricycle driver, nga sa karun yara na sa estable nga kondisyon.
