Pilason ang isa ka motorcycle rider matapos nga aksidente nga nakabunggo sang ido sa National Road, Hacienda Punongko, Barangay Daga, Cadiz City, Negros Occidental sang kahapon sang kaagahon, Agosto 8, 2025.
Sa interview sang Bombo Radyo Bacolod kay Police Lt. Lovella Cordova, Deputy Chief of Police sang Cadiz City Police Station, padayon nga ginabulong sa hospital ang driver sang Honda CLick 125.
Suno kay Cordova, sa imbestigasyon nga ang motorsiklo ang nagabiyahe gikan sa Cadiz City Proper padulong sa Hacienda Bayabas 1, Barangay Daga sang nasambit nga ciudad mga pasado ala 1:00 sang kaagahon.
Apang sang nakalab-ot sa lugar hinali lang nga may nagtabok nga layaw nga ido kag nabungguan sang motorsiklo.
Nahulog ang driver kag nakaangkon sang pilas sa nagkalain-lain nga bahin sang lawas sini.
Gindala ang driver sang personnel sang Cadiz City Disaster Risk and Reduction Management Office sa Cadiz Emergency Clinic samtang ang motorsiklo sini ang gindala sa Cadiz City Police Station.
Nagapanawagan man ini sa mga residente nga mangin responsible sa mga ginasagod nga mga kasapatan kaangay sang mga ido agud nga malikawan nga mangin rason sa pagluntad sang insidente sa dalan.
