Nakilala na ang isa ka lalaki nga nasapwan sa kilid sang kampo sang tubo sa Hacienda Señora, Barangay Salvacion, Banwa sang Murcia, kahapon sang aga.
Ginkilala ang biktima kay Clyde Abaja, 21 anyos, residente sang Prk. 18, Barangay Alangilan, Bacolod City.
Sa interview sang Bombo Radyo Bacolod kay Police Captain Honey Labaro, Officer-in-Charge sang Murcia Municipal Police Station, ang biktima ang residente sang Barangay Alangilan, Bacolod City kag ini ang nagpadulong lamang sa nasambit nga banwa agud nga mag-inum sang makahulubog nga ilimnon.
Suno kay Labaro, mahimo nga naaksidente ang ginasakyan nga motorsiklo sang biktima bangud naglinapta ang tapaludo sang motorsiklo kag ang plaka sini.
Pila man ka metros ang antad sang motorsiklo sa kun sa diin nasapwan ang biktima.
Ang biktima ang naangkon sang bali sa kamot kag pilas sa iban nga bahin sang lawas sini.
Mismo ang amay sang biktima ang nagtumod nga bata sini ang nasampwan sa kilid sang kampo sa nasambit nga lugar.
Nangin emosyonal man ang amay sang biktima sang nakita kag nakumpirmar nga bata sini ang nasapwan.
