Nagbunggu-anay ang Chinese People’s Liberation Army Navy (PLA Navy) warship kag ang China Coast Guard (CCG) vessel sa 10.5 nautical miles sa nasidlangan sang Panatag Shoal subong nga aga.
Suno kay Philippine Coast Guard – West Philippine Sea Spokesperson Commodore Jay Tarriela, samtang madasig nga ginalagas sang CCG vessel 3104 ang BRP Suluan sang Philippine Coast Guard, sila ang nagpatigayon sang risky manuever kag aksidente nga naigo ang PLA Navy ship 164.
Ang collission ang nagresulta sa dako nga damage sa CCG vessel, kag ini ang ginakabig na nga ‘unseaworthy.’
Ang insidente ang natabo samtang nagapatigayon sang “Kadiwa Para sa Bagong Bayaning Mangingisda (KBBM)” operation ang PCG sa Bajo de Masinloc, kun sa diin kaupod nila ang 35 ka mga Filipino fishing boats.
Tatlo ka barko ang gindeploy sang PCG, nga ginalakipan sang BRP Teresa Magbanua, BRP Suluan, kag MV Pamamalakaya agud magdul-ong sang supplies kag gatong sa mga mangingisda.
Sa report, ang mga PCG vessels ang makapila na maka-engkwentro sang “hazardous maneuvers” kag “blocking actions” gikan sa CCG vessels sa nasambitan nga area.
Ang BRP Teresa Magbanua ang gintarget man sang water cannon, nga nahimo nga malikawan sang mga crew members.
Kasunod sang collission, ginpahayag ni Tarriela nga ang PCG ang gilayon man nga nag-offer sang bulig, kalakip na sa man-over-board recovery kag medical aid para sa mga napilasan nga CCG crew members.
Samtang gin-escort naman sang BRP Teresa Magbanua kag MRRV 9701 ang mga mangingisda nga Pilipino sa mas hilway nga lokasyon, kag didto ginpatigayon ang paghatag sang supplies kag gatong.
