Nakilala na ang bangkay sang lalaki nga nasapwan sa dam sang Hacienda Canla-on 1, Barangay Sag-ang, La Castellana, Negros Occidental sang Agosto 14, 2025 sang aga.
Ginkilala ang biktima kay Melvin Sederio, 28 anyos, single kag residente sang Barangay Estefania, Bacolod City.
Madumduman nga sang sang Agosto 14, nakit-an sang isa ka residente nga magakuha sang utan ang bangkay sang biktima nga yara na sa advanced stage of decomposition.
Sa interview sang Bombo Radyo Bacolod kay Police Major Melchor Patna-an, Officer-in-Charge sang La Castellana Municipal Police Station, personal nga nagpadulong sa ila opisina ang amay sang biktima kag ini mismo ang nagtumod sa biktima paagi sa nakita nga tattoo.
Suno kay Patna-an, suno sa amay sang biktima sang 2024 pa nga wala nagatinir sa ila balay ang biktima bangud nagpangita ini sang trabaho kag kun makapauli sa ila balay, pasulit-sulit lang nga ginapahayag sini nga wala pa ini makakita sang trabaho.
Ginahulat pa sang mga kapulisan ang resulta sang postmortem examination.
Panawagan sang hepe sa publiko nga nakasaksi ukon nakahibalo sang matuod nga rason sang kamatayon sang biktima nga mahimo lamang sila makig-angot sa La Castellana Municipal Police Station.
