Nagakahangawa ang Punong Barangay sang Barangay Biak-na-bato, La Castellana, Negros Occidental bangud sa nagnabaw nga Tamburong Creek bangud sa nagtig-a nga lahar kun sa diin nagtapan na ang sapa.
Sa interview sang Bombo Radyo Bacolod kay Punong Barangay Joselito Martinez Jr., nagnabaw na ang sapa kag ginakabalak-an nga magatuga sang pagbaha sa tion nga mag-inulan.
Suno kay Martinez, ang Barangay kag ang Disaster Risk Reduction Management Office sang La Castellana ang nagpasar sang resolusyon nga nagahingyo sang special permit agud makapatigayon sang dredging sa suba.
Suno kay Martinez, ginpahanugutan ang dredging apang ang hauling ukon pagdala sa iban nga lugar sang mga materyales ang ginadumilian sang Protected Area Management Board (PAMB) paagi sa ila nga Resolution No. 17.
Suno sa Punong Barangay, dako ang palamangkutanon sa karun kun sa diin sini dal on ang mga makuha nga mga balas kag bato nga nagbara sa suba.
Dugang pa sini nga sadto madalom ang sapa apang sa karun tuman na kanabaw bangud sa nagtig-a nga lahar kag nadugangan pa sang mga balas kag bato.
Suno diri, problema nila kun sa diin itambak ang makuha nga mga balas kag bato sa dredging bangud ang Barangay ang gamay lang man.
Plano sini kuntani nga ibaligya ang mga makuha sa sapa kag ang revenue ang ibulig sa mga Internally Displaced Individuals ukon IDPs.
Sa karun, ginahulat sang mga ini ang himuon nga tikang sang alkalde sang banwa angot diri.
