Ginpanindugan sang assistant Regional Director sang Department of Public Works and Highways – Negros Island Region (DPWH-NIR) nga wala sang ghost flood control project sa ciudad sang San Carlos.
Madumduman nga ginapadal-an sang sulat sang DPWH national office si San Carlos City Mayor Renato Gustilo nga ginapakumpirmar kun may yara gid man sang tatlo ka mga flood control projects nga gintukod sa ciudad kasubong man ang ginpadala nga acceptance letter nga may pirma sini kag sang personnel sang City Engineers Office sang San Carlos City.
Hugot nga ginpanginwala sang alkalde ang nasambit nga mga flood control projects ang wala naga-exister sa San Carlos City matapos nga ini ang ila nga nakumpirmar gikan sa DPWH San Carlos City Engineering District.
Ang tatlo ka mga proyekto ang ginalakipan sang isa ka P77.5 million; isa ka P77.3 kag isa ka P151.5 million.
Nagpahayag man ang alkalde nga gin-forged ang iya perma sa acceptance letter.
Sa interview sang Bombo Radyo kay Engr Rodney Gustilo, assistant Regional Director sang DPWH-NIR, wala sang ghost project sa ciudad sang San Carlos kag mas maayo suno diri nga bisitahon ang lugar kag lantawon ang record sang District Engineering Office agud ma-athagan antes maghambal nga may ghost project sa ciudad.
Samtang, bukas ang Department of Public Works and Highways (DPWH)- Negros Island Region (NIR) sa pagpatigayon sang reshuffling sa district engineers sa bilog nga pungsod.
Madumduman nga may ginpatigayon nga Senate Blue Ribbon Committee hearing kahapon sa pag-address sa mga anomalya sa flood control projects.
Kasunod sini nagpropose si Senator JV Ejercito i-reshuffle ang district engineers kag ini gin-welcome man ni DPWH Secretary Manuel Bonoan.
Sa interview sang Bombo Radyo kay Engr Rodney Gustilo, assistant Regional Director sang DPWH-NIR, may yara sang kapin 10 ka district engineering office sa rehiyon.
Suno diri, maayo nga may reshuffling agud wala sang familiaroty sa tunga sang DPWH kag mga contractors.
Pahayag ni Gustilo, bisan bag-o pa lamang natukod ang NIR kag nakaligad nga tuig pa lang sila nag-umpisa sa pag-operate, sila nagapatigayon man sang inspection kag pag-validate sa mga flood control projects sa rehiyon.
Nagpasalig si Gustilo nga wala sang ghost project sa bilog nga rehiyon sang Negros Island Region.
