Ginreklamo sang mga pumuluyo sang Purok Gonzaga, Brgy Mansilingan, Bacolod City ang poultry farm kun sa diin naghalin ang mga langaw nga nagahalit sa lugar.
Suno kay Alquin Dela Rosa, sadto sang gintukod ang poultry farm wala sang problema sa baho ukon sa langaw man, apang sa karun gid lamang nagduging ang langaw.
Ang duta ginapanag-iyahan sang ROU apang ini ginrentahan sang Vitarich Corporation.
Suno diri, kun magbukas sang gate ang poultry farm amo man nga nagagwa ang mga langaw.
Pahayag sini, may yara sang petition nga ginhimo apang iban sa mga nagperma, nagback out bangod luyag nila nga hatagan sang tsansa ang poultry farm.
Samtang, nagconduct naman sang inspection ang Brgy Mansilingan kaupod ang City Health Office sa area.
Suno kay Ronilo Apellido, summon officer sang Brgy, gincontact na ang technician kag maintenance team sang poultry farm agud pangitaan nila sang solusyon nga indi makagwa ang langaw.
Suno diri, adlaw-adlaw ginatwagan ang poultry farm kag nagapasalig nga may yara na sang ipadala nga fly traps.
Apang sa pagtsekyar sang City Health Office ang area natukiban nga didto nagahalin ang madamo nga langaw amo nga gindagdagan sang temporary closure ang poultry farm.
Sa karun, indi na gid man madamo ang langaw bangod nag-untat na sa pag-operate ang poultry farm.
