Nagpanindugan ang designated nga spokesperson ni San Carlos City Mayor Renato Gustilo nga wala nagaexister sa amo nga ciudad ang tatlo ka mga proyekto nga ginapakumpirmar sang DPWH national office sa alkalde.
Sa interview sang Bombo Radyo Bacolod kay Joe Alingasa, sa bahin sang Department Works and Highways (DPWH) wala sang ghost project bangud may mga proyekto man sila nga ginpatuman sa ciudad sang San Carlos.
Suno kay Alingasa wala nakahibalo ang DPWH San Carlos City Engineering District angot sa sulat sang DPWH national office sa alkalde nga nagapakumpirmar sang tatlo ka mga projects
Suno diri ang luyag sang alkalde nga maathagan amo ang tatlo ka mga proyekto nga ginapahayag napatuman sa ciudad apang wala man naga-eksister.
Wala man una nakahibalo ang alkalde angot sa nasambit nga mga proyekto tubtob nga may nabaton lamang ini nga sulat nagikan sa DPWH central office.
Ang tatlo ka mga proyekto ang ginalakipan sang isa ka P77.5 million; isa ka P77.3 million kag isa ka P151.5 million.
Una nga construction ang flood control sa Andoon river nga nagabalor sang P77.5 million kag ginpatuman sang EKC Construction and Aggregates nga sunod sa datus ginsugudan sang April 13, 2023 kag natapos sang Disyembre 2023.
Ika-duha ang pag-construct sang flood control sa suba sang Jigalaman sa Barangay Guadalupe nga nagabili sang P77.3 million kag ginpatuman sang Jaben General Contracting Engr. Services nga santo sa report ginsugudan sang Abril 12, 2023 kag natapos sang Disyembre 14, 2023.
Samtang ang ika-tatlo ang construction sang flood control sa Palampas river sa Brgy. 1, San Carlos City nga nagabili sang P151.5 million kag ginpatuman sang APO General Construction.
Ang tatlo ka mga proyekto sa idalom sang mga nasambitan nga contractors ang wala nagaeksister sa ciudad kun may proyekto man sa lugar lain ang contractor kag lain ang amount sang proyekto.
Nagahulat sa karun ang alkalde sang sabat nagikan sa NBI national office angot sa sulat nga ginpadala sang mga ini matapos nga ginpahayag nga gin-forge ang pirma sang alkalde sa acceptance letter.
