Nagapadayon ang provincial government sang Negros Occidental sa pagnegosyar sa Silay City Government angot sa Bulk Water Supply Project.
Sa interview sang Bombo Radyo Bacolod kay Negros Occidental Provincial Administrator Atty. Rayfrando Diaz, may yara sang indi pagsanto-anay ang provincial government kag ang city government sang Silay angot sa bulk water supply project sang probinsya.
Suno kay Diaz, ang nasambit nga proyekto ang may tinutuyo nga amligan ang dunang-manggad kag kuhaon na ang pagka-depende sang mga pumuluyo sa tubig nagikan sa bubon.
Dugang pa sini nga luyag sang provincial government nga ang mga Local Government Units ang mangin abundant ang mga pumuluyo sa tubig sa palaabuton kasubong man mangin resilient ang mga ini.
Suno sa provincial administrator nga ang nasambit nga proyekto ang may tinutuyo man nga maplastar amat-amat ang clean potable water sa probinsya nga para man sa ikaayong lawas sang mga pumuluyo.
Dugang pa sini nga kun matinlo ang ginagamit nga tubig malikawan man ang pagdamo sang water borne diseases.
Ginpahayag man ni Diaz nga mismo ang Silay Water District ukon ang Siciwa ang nagkontrata man sa bulk water supply projects sang probinsya bangud sila mismo ang ginakulang man sang water supply.
Ang nasambit nga tikang ang nagasunod man sa national kag international master plans.
Isa diri ang Philippine Water Supply and Sanitation Master Plan nga nagapahayag nga sa 2030 nga ang Negros Occidental ang makaeksperyensya sang water stressed kun magpadayon sa pagkuha sa mga Bomba.
Sa karun ang provincial government ang wala nagauntat sa pagnegosyar sa Silay City Government kag nagalaom nga mahangpan na nga ang proyekto ang kabahin sang tikang para sa water security plan sa probinsya.
