Ginpasalamatan sang Department of Public Works and Highways-Negros Island region ang Bombo Radyo Bacolod sa pag-upod sa pagtsekyar sang mga flood control projects nga napatuman sa San Carlos City.
Sang Huwebes nag-upod ang Bombo News Team sa team sang DPWH-San Carlos City agud lantawon ang mga flood control projects sa Andoon, Jigalaman kag Palampas river apang ang contractor ang lain sangsa nakaindicate dokyumento nga ginpadala sang DPWH central office kay San Carlos City Mayor Renato Gustilo.
Sa interview sang Bombo Radyo Bacolod kay Engineer Rodney Gustilo, Assistant Regional Director, DPWH-NIR nag-imbetar sila sang Local Government Unit sang San Carlos kag sa Bombo Radyo agud nga magpatigayon sang ocular inspection sa mga contrata nga ginpatuman sang DPWH Negros Occidental sa tatlo ka mga suba.
Ini ang ginalakipan sang flood control projects sa Andoon river nga may balor nga P40 million kag ang contractor amo ang Kenneth Construction and General Merchandise nga gin-umpisahan sang April 5 2023 kag natapos sang December 2, 2023; Jigalaman river nga nagabalor sang P95 million sa idalom sang Kenneth Construction and General Merchandise nga nag-umpisa sang March 2, 2023 kag natapos sang December 24, 2023; Palampas river nga may balor nga P75 million sa idalom sang C’zarles Construction and Supply nga nag-umpisa sang March 2, 2023 kag natapos sang December 2, 2023.
Ang inspection ang nagconclude nga wala sang ghost project ang DPWH-NIR.
Suno kay Gustilo ang nabaton nga dokyumento sang alkalde ang isa ka fictitious document.
Bangud sini nagreact ang alkalde kag ginpaimbestigaran sa NBI kun sin-o ang responsable sa likod sang nasambit nga dokyumento.
Sa karun nagrequest sila sang official written statement nga may pirma sang alkalde nga nagapatuod nga wala sang ghost project sa ciudad kag ini ang ipasa nila sa DPWH central office.
