Halos indi mapatihan ang isa ka case report nga ginpagwa sang United States National Library of Medicine nga may kaangtanan sa isa ka lalaki nga nadiskubrehan nga may kutsilyo sa iya dughan sa sulod na sang walo ka tuig.
Ini nga lalaki naga-edad sang 44-anyos kag tumandok sang Tanzania sa East Africa.
Nagpangayo ini sang bulig sa mga doktor matapos nakit-an sini ang nana nga nagaguwa sa iya nga right nipple.
Wala siya sang na-eksperyensyahan nga pagpalanakit sang dughan, kabudlay sa pagginhawa, ubo, ukon hilanat, apang gin-ako sini nga walo ka tuig ang nakaligad, na-involve siya sang isa ka away kag nakaangkon sang samad sa iya nga nawong, likod, dughan, kag tiyan.
Ginhatagan lang siya ang first aid halin sa primary health facility kag gintahi ang iya mga pilas, apang wala na sang body scans nga ginhimo bangud limitado man ang pasilidad sa ila nga lugar.
Apang sang naggwa na ang nana, ginpa-X-ray ang lalaki, kag didto nakita sang mga doktor ang metallic object nga isa gali ka kutsilyo sa natuo nga bahin sang iya nga dughan.
Gilayon nga gin-operahan ang lalaki kag ginkuha ang kutsilyo nga napalibutan na sang nana kag necrotic tissue.
Gin-monitor ang kondisyon sang lalaki kag ginpagwa man sa ospital makaligad ang napulo ka adlaw.
