Mistaken identity ang isa sa ginalantaw nga rason sa pagpatay sa driver sang van sang Cosmopolitan Christian Church sa Brgy.Taculing, Bacolod City sang Domingo.
Ginkilala ang biktima kay Efren Banaglorioso, 59 anyos kag residente sang Brgy.Granada, Bacolod City.
Sa interview sang Bombo Radyo Bacolod kay Police Captain Rosalino Pugoy Jr, station commander sang Bacolod Police Station 6, padayon ang ila monitoring sa itom nga Montero nga ginsakyan sang ginalantaw nga mga suspek sa krimen.
Suno kay Pugoy, ginahulat man nila ang report sa Scene of the Crime Operation (SOCO) Team agud nga mahibaluan kun ano nga kalibre sang armas ang gingamit sa pagtiro patay sa biktima.
Ang biktima ang nakaagom sang pilas sa ulo, sa likod kag sa dulunggan.
Ang recoveries sa crime ang anum ka basiyo sang bala.
Ginpahayag nga wala man sang kontra ang biktima bangud 40 na ini ka tuig nga nagadrive sa simbahan.
Padayon pa ang imbestigasyon sang mga kapulisan agud nga matumod ang motibo sa pagpatay sa biktima.
