“ISLAN SI WARDEN!!!” ang nangin panawagan sang mga person’s deprived of liberty (PDL) sang Negros Occidental District Jail (NODJ) sa ginpatigayon nila nga noise barrage.
Sa interview sang Bombo Radyo Bacolod kay Alyansa Makabayan spokesperson Noli Rosales, sila ang gilayon nagpadulong sa NODJ matapos makita sa social media ang ginapatigayon nga pagprotesta sang mga PDLs.
Sa natipon nila nga impormasyon gikan sa mga pamilya sang PDLs nagsugod lamang ang pag-antos sang mga priso sang magpungko si Jail Chief Inspector Atty Crisyrel Awe bilang Jail Warden.
Reklamo sang mga ini nga indi na makabisita ang mga pamilya kag makadul-ong sang pagkaon sa ila priso, apisar nga ini ang ginapahanugutan sang layi.
Indi man makatawo suno sa mga ini ang ila pagkaon, kag tuman man ka mahal ukon overpriced ang mga balaklon sa sulod sang jail facility.
Wala naman sila ginapahanugutan nga makatanom ukon ang ‘Taniman sa Loob ng Piitan’ program sang Bureau of Jail Management and Penology (BJMP), nga kuntani nagaserbe livelihood program para sa mga PDLs agud bisan yara sa prisuhan sila ang makasuporta sa ila pamilya.
Suno kay Rosales, nga panawagan lamang sang mga PDLs nga sila ang trataron man nga tawo.
Sila ang nagapanawagan man sa Commission on Human Rights (CHR) nga matutukan ang issue kag mabuligan ang mga priso.
Luwas sa mga reklamo, sila ang may ginakaptan man nga dokumento tuhoy sa New People’s Army member nga si Rogelio Posadas nga nagakinahanglan sang medical attention apang gindingutan sang iya kinamatarong.
