Panawagan sang Bayan Muna nga unahan ni President Ferdinand “Bongbong” Marcos Jr. ang pagpagwa sang iya Statement of Assets, Liabilities, and Net Worth (SALN) agud pamarisan sang iban.
Sa interview sang Bombo Radyo Bacolod kay Bayan Muna Executive Vice President Atty Carlos Isagani Zarate, nagakadapat nga unahan sang mga matag-as nga opisyal ang kaangay sang Presidente, Bise Presidente, Senador kag Kongresista ang pagdisclose sang SALN.
Dugang pa sini nga wala na dapat sang ihatag nga kondisyon antes magbuyagyag sang SALN, bangod sa karun antes marequest nga mapagwa ang SALN sang isa ka opisyal kaangay nga magalabay pa sa buho sang dagom.
Panindugan ni Zarate nga dapat seryosohon ang lifestyle check bangod ang mga elected kag appointed officials ang dapat nagapangabuhi sang patas kag indi ma-imbulbar sa iskandaloso nga sahi sang pagpangabuhi.
Suno diri, ginahimo na sadto ang lifestyle checking sang Office of the Ombudsman, apang ginpa-untat sang magpungko si anay Ombudsman Samuel Martires sa panindugan nga ini ang ginagamit agud mangharras sang mga opisyal.
Apang sa karun, ang mga government officials kalakip na ang ila pamilya ang kaangay nga nagapadayaw pa sang ila mga manggad.
Panindugan ni Zarate nga dapat makita ang assets sang mga opisyales antes magsulod sa government office, agud mahibaluan kun may-ara sang hinali nga paghabok.
Ini ang makatilingala bangod indi man tanto ka dako ang sweldo sang mga government officials.
Aminado man ini nga may iban nga sagad magtago kag ginapangalan sa iban ang ila mga propedad.
Panawagan sini nga mangin proactive ang Office of the Ombudsman, ilabi na ang mga resident ombudsman nga ginabutang sa kada opisina sang gobyerno, agud magserbe nga bantay sa graft and corrupt practices.
Dugang pa sini nga panawagan nga sa pagtake-oath sa pagpirma sang SALN, dapat ini ang lakipan sang waiver nga magahatag sang access kun kinahanglan ipakita ang dokumento.
Suno diri, madamo sang nagasulod sa gobyerno indi para magserbisyo, kundi ini ang ginakabig nga negosyo.
Ang nagakatabo ang makabig sini repliksyon sang nagalala nga systema sa budgeting kag patronage system sa politika sang Pilipinas.
