Arestado ang isa ka suldado matapos gintiro kag nasamaran ang isa ka tricycle driver kasubong man ang nagresponder nga kapulisan sa Barangay 1, Himamaylan City, Negros Occidental kahapon alas-2:34 sang kaagahon.
Sa interview sang Bombo Radyo Bacolod kay Police Lt Col Anthony Grande, hepe sang Himamaylan City Police Station, ang suldado ang katapo sang 94th Infantry Battalion sang Philippine Army samtang ang tricycle driver ang ginkilala naman nga si Alyas Sandy.
Suno diri, naga-inom sang makahulubog nga ilimnon ang suldado sang ini ang nagpalupok sang cal. 45 pistol.
Gintinguhaan ni Sandy nga maagaw ang armas sang suldado, apang bangod ini ang dako kag makusog natumba ang driver kag natiruhan sa tiil.
Nahimo naman nga makapalagyo sang biktima kag ginhingagaw sa ospital agud mabulong.
Sa pagresponder sang kapulisan, sila ang ginpalukpan man sang suldado, kag ginapakamaayo na lamang nga wala sang may naigo.
Gilayon man nga ginfile paagi sa inquest proceedings ang kaso nga Direct Assault bangod sa pagtiro sa mga kapulisan.
Ginahulat naman ang desisyon sang driver kun makagwa ini sa ospital kun siya ang magapasaka man sang kaso nga mahimo alarm and scandal kag attempted homicide.
