Nagapati si Association of Concerned Teachers Partylist Representative Antonio Tinio, nga mas dako pa ang kurapsyon sa Pilipinas kun ipaanggid sa Indonesia kag Nepal.
Sa interview sang Bombo Radyo Bacolod kay Tinio, wala sini nahibaluan ang konteksto sang nagluntad nga maduguon nga mga rally protesta sa Indonesia kag Nepal, apang nakahibalo ini nga nahanungod man sa malala nga kurapsyon.
Apang sa mga nabuyagyag nga kadakuon sang mga ginkamol nga manggad sang mga involved sa anomalous flood control projects, nga nagadangat sa ginatos ka bilyon, nagapati ini nga mas dako ang kurapsyon sa Pilipinas.
Gani indi na mabasol ang mga nagakatabo nga mga rally, nga sa karun magagmay lamang apang lauman ang massive rally sa Setyembre 21 sa Luneta.
Pahanumdom sini nga ini ang paagi sang mga pumuluyo agud ipakita nga sila ang akig na sa tuman ka lala nga kurapsyon.
Dugang pa sang mabuyagyag sa House inquiry ang binilyon ka pesos nga yara sa lamesa sang Department of Public Works and Highways (DPWH) office, nga halin sa tax payers money.
Suno diri, ang pumuluyo ang magadesisyon kun matabo sa Pilipinas ang kaangay sa natabo sa Indonesia kag Nepal.
Gani, dapat binagbinagon na sang mga involved nga opisyal, sa Senado, Kamara, DPWH kag kontratista kun paano sabton ang ila hinimuan.
Suno kay Tinio, dapat ang imbestigasyon ang may padulungan, may-ara sang makasuhan kag may-ara sang mapriso.
Samtang indi man manigar nga may Command Responsibility si President Ferdinand “Bongbong” Marcos Jr.
Suno kay Tinio, bisan si Marcos ang nagbukas sang imbestigasyon, indi matago nga sa iya administrasyon nakit-an ang pinakadako nga mga Congressional kag Senatorial insertions.
