Dismayado ang Association of Concerned Teachers Partylist sa indi pagtambong ni Vice President Sara Duterte sa budget hearing angot sa 2026 budget sang Office of the Vice President.
Sa interview sang Bombo Radyo Bacolod kay ACT Partylist Representative Antonio Tinio, constitutional obligation dapat sang mga department heads ang pag-atubang sa budget hearing, gani indi nila mahangpan ang rasun sang Bise Presidente sa indi pagtambong.
Si VP Sara ang nagpadala lamang sang OVP Assistant Secretary bilang Representative, apang ginpili nga isuspend ang session bangod indi limitado lamang ang papel sang opisyal nga indi kwalipikado sa pagdepensa sang budget.
Panindugan sini nga si VP Sara lamang ang maksabat sa mga pamangkot angod sa mga nagamitan na sang pondo kaangay sa confidential fund, kag mga programa nga ipatuman.
Kasubong man sa kwestyon sa masami sini nga pag-absent bangod sa mga personal nga rasun.
Suno kay Tinio apisar nga personal budget ni VP Sara ang ginagamit sa pagtravel abroad, siya ang magakinahanglan nga magdala sang madamo nga body guards nga ginapaswelduhan sang mga pumuluyo.
Bangod sini, ang House of Representative ang nagdesisyon nga dayunon na lamang ang hearing kun yara na ang second in command ukon Bise Presidente.
Nagkomiter naman si VP Sara nga personal na ini nga magatambong sa Martes.
Suno diri, ginakwestyon sang Bise Presidente ang pasulit-sult nga mga pamangkot, apang pahanumdom sini nga mauntat lamang ang pamangkot kun masabat na ni VP Sara.
Kun confidential ang mga impormasyon, panugyan sini ang pagpatawag sang executive session.
Ginapaabot na sini nga magarequest si VP Sara sang parliamentary courtesy, apang pangabay ni Tinio nga ini ang iwaive ukon indi batunon sang Kamata.
Pahanumdom ni Tinio nga sa pagdangat sa plenaryo, kongresista na ang magapamangkot kag kongresista man ang magadepensa sang budget, gani ang budget hearing gid lamang ang tion nga makaatubang ang head sang ahensya.
