Nagapanawagan ang pamilya sang nasapwan nga nagautaw-utaw na sa dagat sa bahin sang Talisay City, Negros Occidental sang Biyernes, Setyembre 12 nga mabuligan ang mga ini sa pagpalubong sa biktima.
Sa interview sang Bombo Radyo Bacolod kay Police Lt. Col. Alvin Christopher Baybayan, hepe sang Talisay City Police Station nga positibo nga gintumod sang lola nga apo niya ang nasapwan nga bangkay.
Ginkilala ini kay Bryan Perino, 23 anyos alyas Dikoy nga residente sang Villa Esperanza, Barangay Tangub, Bacolod.
Suno kay Baybayan, wala man nagpasugot ang pamilya nga ipaidalom ang bangkay sang biktima sa postmortem examination.
Panawagan lamang sang pamilya nga mabuligan ang mga ini sa pagpalubong sa nagtaliwan nila nga himata.
Ang biktima ang nadula sang Miyerkules antes nasapwan nga wala na sang kabuhi.
Una na nga ginpahayag ni Lieutenant Junior Grade John Hoffer Olis, pinuno sang Public Information Office sang Coast Station Northern Negros Occidental, alas 5:00 sang hapon sang Biyernes, may nabaton sila nga tawag halin kay Rodolfo Borsan nga residente sang Barangay Zone 3, Talisay City.
Suno kay Olis kaupod ang PNP Maritime Group gilayon nga nagpatigayon sang search and retrieval operation ang katapo sang PCG tubtob alas 2:00 ang takna kahapon sang kaagahon apang bangud sa malain nga tiyempo wala makita ang bangkay.
Kahapon sang udto, narekober ang lawas sang biktima.
“Bloated” na ang lawas sang biktima sang nasapwan, may tattoo ini sa iya nga dughan kag nagasuksok sang boxer short.
