“So talagang safe ka na!,” lahog ni Sen Marcoleta kay Sen Estrada matapos ginpanginwala sang isa ka kontraktor ang kaangtanan sini sa flood control project issue

Ginpanginwala sang isa ka kontraktor ang paghatag sang kickback kay Senator Jinggoy Estrada sa nagapadayon nga hearing sang Senate Blue Ribbon Committee sa maanomaliya nga flood control projects kahapon, Setyembre 18.

Ini matapos gin-akusahan ni Department of Public Works and Highways (DPWH) engineer Brice Hernandez ang representative sang WJ Construction nga si Mina Elamparo-Jose nga ginaalegar nagdul-ong sang kickbacks sa Senador.

Apang ini ang ginpanginwala naman sang nasambit nga representative.

Suno diri, wala ini nalakip sa anuman nga illegal nga aktibidad kag wala man siya naghatag ukon nagbaton sang anuman nga kwarta nagikan sa sin-o man nga public official ukon empleyado sang gobyerno bisan kay Brice Hernandez.

Direkta naman nga ginpamangkot ni Senator Rodante Marcoleta si Jose kun kilala sini si Estrada ukon nakadul-ong ini sang kwarta sa iya nga nagsabat nga wala ini sang may gindul-ungan sang kwarta.

Gilayon naman nga ginhambalan ni Marcoleta si Estrada sang mga tinaga nga “so talagang safe ka na” nga nagapatimaan nga siya ang luwas na.