Magapadayon ang provincial government sa pagpatigayon sang clearing operation sa Ibid Creek, Barangay Biaknabato, La Castellana, Negros Occidental.
Suno sa Negros Occidental Governor Eugenio Jose “Bong” Lacson, padayon ang pagpatigayon sang clearing operation sa Ibid Creek matapos nga napuno naman sang mga volcanic materials bangud sa pagbubo sang madamol nga ulan.
17 ka balay ang naapektuhan sang pag-awas sang tubig sa Ibid Creek, matapos nga liwat na naman nga nag-ilig ang dako nga volume sang tubig bangod sa pag-ulan sang Domingo.
Liwat na naman nga nagsupon ang mga volcanic materials sa tamburong nga amat-amat na kun tani nga nahawanan kasunod sa clearing operations nga ginpatigayon sang municipal kag provincial government.
Nagmando si Lacson sa Provincial Engineer nga kun may equipment ang provincial government nga kinahanglan, ini ang ipadala sa La Castellana agud nga mas mapadasig ang pagpatigayon sang clearing operations.
Nagapanawagan man ang gobernador nga kun mahimo pasugtan na ang mga commercial companies nga magbulig sa probinsya.
